Aissi mou - un sonet nou

    Aissi mou              un sonet nou

           on ferm e latz

    chanson leu,           pos vers plus greu

            fan sorz dels fatz:

5

    qu'er er vist            pos tan m'es quist,

            cum sui senatz;

si cum sol            fora mos cors vezatz,

    mas camjar l'ai pos quecs o vol.

    Tot m'es nou           quan vei, si·m mou

10

              fin'amistatz;

    far puosc greu,         vas que dic leu,

               mas voluntatz.

    Tant ai quist             que ai ben vist

                cum poja gratz;

15

qu'al mo vol               for'eu aut pojatz:

   anquer es mos gratz lai on sol.

    Tant ai prim           mon cur quan rim,

              que·ls adiratz

    tem de loing,         mas de pres poing

20

               cum fos amantz

    per cel joi             don fals ni croi

                non an solatz;

trop derenc               car dic qu'il m'am,qu'assatz

   fai si·m sofre qu'eu l'am sovenc.

25

    Amors, rim           co·s voilla prim,

              pos m'es de latz

    en que poing,         qu'ab colp de loing

               son pres nafratz;

    tot m'es croi             quan d'autre joi

30

                sol me tocatz:

si no·us venc,               Amors, mala fui natz!

   que posc'amar e mens ric renc!

    Ges un ou           non pretz quan plou,

              si·m sui moillatz,

35

    freg ni neu,         tant ai pes breu

               del joi que·m platz;

    mas per Crist,             pos mi fai trist

                quan pes iratz,

cor ai fol               car am sols ses solatz:

40

   aissi torn mon bon pes en dol.

    Era·m plou,           que·m fai on ou

              trucan los datz,

    e si·n breu         vei cazer neu,

               anz es estatz;

45

    tant ai trist             mon cor per Crist,

                totz sui camjatz:

qu'er ai dol               et er ai gaug viatz,

   ve·us m'en savi e veáus m'en fol.

    Quant nos vim,           sempr'es al cim

50

              mos cors ausatz,

    pois d'als soing         non ac ni·s joing

               vas autre latz,

    per que coi             qu'alres m'enoi:

                trop l'am! non fatz!

55

lai la tenc               eu quant al cor platz,

   qu'anc pos la vic d'als no·m sovenc.

    Sus d'aut cim           fui,quant nos vim,

              jos davalatz;

    si no·s joing         so dont ai soing

60

               mal sui liatz!

    qu'il m'enoi,             Amors, per coi:

                d'ela pensatz;

no·us sovenc               anc de lai, mas mi datz

   la mort, car vezetz que no·m tenc.

65

Trop mi tenc,               que lai non sui anatz

   saber d'amor s'anc l'en sovenc.

No·m sovenc               anc de lai, so sapchatz,

   mas una vetz que·m vi eám tenc.